Saññāvedayitanirodhaṁ samāpanno kālaṁ kareyyāti? Āmantā. Atthi saññāvedayitanirodhaṁ samāpannassa māraṇantiyo phasso, māraṇantiyā vedanā, māraṇantiyā saññā, māraṇantiyā cetanā, māraṇantiyaṁ cittanti? Na hevaṁ vattabbe …pe… natthi saññāvedayitanirodhaṁ samāpannassa māraṇantiyo phasso, māraṇantiyā vedanā, māraṇantiyā saññā, māraṇantiyā cetanā, māraṇantiyaṁ cittanti? Āmantā. Hañci natthi saññāvedayitanirodhaṁ samāpannassa māraṇantiyo phasso, māraṇantiyā vedanā, māraṇantiyā saññā, māraṇantiyā cetanā, māraṇantiyaṁ cittaṁ, no ca vata re vattabbe— “saññāvedayitanirodhaṁ samāpanno kālaṁ kareyyā”ti. Saññāvedayitanirodhaṁ samāpanno kālaṁ kareyyāti? Āmantā. Atthi saññāvedayitanirodhaṁ samāpannassa phasso vedanā saññā cetanā cittanti? Na hevaṁ vattabbe …pe… natthi saññāvedayitanirodhaṁ samāpannassa phasso vedanā saññā cetanā cittanti? Āmantā. Aphassakassa kālaṅkiriyā, avedanakassa kālaṅkiriyā …pe… acittakassa kālaṅkiriyāti? Na hevaṁ vattabbe …pe… nanu saphassakassa kālaṅkiriyā …pe… sacittakassa kālaṅkiriyāti? Āmantā. Hañci saphassakassa kālaṅkiriyā …pe… sacittakassa kālaṅkiriyā, no ca vata re vattabbe— “saññāvedayitanirodhaṁ samāpanno kālaṁ kareyyā”ti.