Sāvako hutvā buddho hotīti? Āmantā. Anussaviyoti? Na hevaṁ vattabbe …pe…. Anussaviyoti? Āmantā. Nanu bhagavā sayambhūti? Āmantā. Hañci bhagavā sayambhū, no ca vata re vattabbe— “anussaviyo”ti. Bodhisatto kassapassa bhagavato pāvacane okkantaniyāmo caritabrahmacariyoti? Āmantā. Bhagavatā bodhiyā mūle tīṇeva sāmaññaphalāni abhisambuddhānīti? Na hevaṁ vattabbe …pe…. Nanu bhagavatā bodhiyā mūle cattāri sāmaññaphalāni abhisambuddhānīti? Āmantā. Hañci bhagavatā bodhiyā mūle cattāri sāmaññaphalāni abhisambuddhāni, no ca vata re vattabbe— “bodhisatto kassapassa bhagavato pāvacane okkantaniyāmo caritabrahmacariyo”ti. Bodhisatto kassapassa bhagavato pāvacane okkantaniyāmo caritabrahmacariyoti? Āmantā. Bodhisatto dukkarakāriyaṁ akāsīti? Āmantā. Dassanasampanno puggalo dukkarakāriyaṁ kareyyāti? Na hevaṁ vattabbe …pe…. Bodhisatto aparantapaṁ akāsi, aññaṁ satthāraṁ uddisīti? Āmantā. Dassanasampanno puggalo aññaṁ satthāraṁ uddiseyyāti? Na hevaṁ vattabbe …pe….