Vipāko atthīti, vipākapaṭisaṁvedī atthīti? Āmantā. Mahāpathavī atthīti …pe… mahāsamuddo atthīti … sinerupabbatarājā atthīti … āpo atthīti … tejo atthīti … vāyo atthīti … tiṇakaṭṭhavanappatayo atthīti, tiṇakaṭṭhavanappatīnaṁ paṭisaṁvedī atthīti? Na hevaṁ vattabbe …pe…. Vipāko atthīti, vipākapaṭisaṁvedī atthīti? Āmantā. Añño vipāko, añño vipākapaṭisaṁvedīti? Na hevaṁ vattabbe. (Saṅkhittaṁ.) Purisakārānuyogo. Kalyāṇavaggo paṭhamo. Abhiññānuyoga Na vattabbaṁ— “puggalo upalabbhati saccikaṭṭhaparamatthenā”ti? Āmantā. Nanu atthi koci iddhiṁ vikubbatīti? Āmantā. Hañci atthi koci iddhiṁ vikubbati, tena vata re vattabbe— “puggalo upalabbhati saccikaṭṭhaparamatthenā”ti. Na vattabbaṁ— “puggalo upalabbhati saccikaṭṭhaparamatthenā”ti? Āmantā. Nanu atthi koci dibbāya sotadhātuyā saddaṁ suṇāti …pe… paracittaṁ vijānāti … pubbenivāsaṁ anussarati … dibbena cakkhunā rūpaṁ passati … āsavānaṁ khayaṁ sacchikarotīti? Āmantā. Hañci atthi koci āsavānaṁ khayaṁ sacchikaroti, tena vata re vattabbe— “puggalo upalabbhati saccikaṭṭhaparamatthenā”ti. Atthi koci iddhiṁ vikubbatīti katvā tena ca kāraṇena puggalo upalabbhati saccikaṭṭhaparamatthenāti? Āmantā. Yo iddhiṁ vikubbati, sveva puggalo? Yo iddhiṁ na vikubbati, na so puggaloti? Na hevaṁ vattabbe …pe….