Na vattabbaṁ— “samāpannassa atthi vacībhedo”ti? Āmantā. Nanu vitakkasamuṭṭhānā vācā vuttā bhagavatā— “paṭhamaṁ jhānaṁ samāpannassa atthi vitakkavicārā”ti? Āmantā. Hañci vitakkasamuṭṭhānā vācā vuttā bhagavatā— “paṭhamaṁ jhānaṁ samāpannassa atthi vitakkavicārā”, tena vata re vattabbe— “samāpannassa atthi vacībhedo”ti. Vitakkasamuṭṭhānā vācā vuttā bhagavatā— “paṭhamaṁ jhānaṁ samāpannassa atthi vitakkavicārā”ti, atthi tassa vacībhedoti? Āmantā. Saññāsamuṭṭhānā vācā vuttā bhagavatā— “dutiyaṁ jhānaṁ samāpannassa atthi saññā, atthi tassa vitakkavicārā”ti? Na hevaṁ vattabbe …pe…. Vitakkasamuṭṭhānā vācā vuttā bhagavatā— “paṭhamaṁ jhānaṁ samāpannassa atthi vitakkavicārā”ti, atthi tassa vacībhedoti? Āmantā. Saññāsamuṭṭhānā vācā vuttā bhagavatā— tatiyaṁ jhānaṁ …pe… catutthaṁ jhānaṁ … ākāsānañcāyatanaṁ … viññāṇañcāyatanaṁ … ākiñcaññāyatanaṁ samāpannassa atthi saññā, atthi tassa vitakkavicārāti? Na hevaṁ vattabbe …pe….