Ājānāhi niggahaṁ. Hañci dutiye citte uppanne na vattabbaṁ— “soti vā aññoti vā”, tena vata re vattabbe— “dutiye citte uppanne na vattabbaṁ— ‘devoti vā manussoti vā’”ti. Yaṁ tattha vadesi— “vattabbe kho— ‘dutiye citte uppanne na vattabbaṁ— soti vā aññoti vā, dutiye citte uppanne vattabbaṁ— devoti vā manussoti vā’”ti micchā. Hañci vā pana dutiye citte uppanne vattabbaṁ— “devoti vā manussoti vā”, tena vata re vattabbe— “dutiye citte uppanne vattabbaṁ— ‘soti vā aññoti vā’”ti. Yaṁ tattha vadesi— “vattabbe kho— ‘dutiye citte uppanne na vattabbaṁ— soti vā aññoti vā, dutiye citte uppanne vattabbaṁ— devoti vā manussoti vā’”ti micchā …pe…. Na vattabbaṁ— “puggalo upalabbhati saccikaṭṭhaparamatthenā”ti? Āmantā. Nanu yo passati yaṁ passati yena passati, so passati taṁ passati tena passatīti? Āmantā. Hañci yo passati yaṁ passati yena passati, so passati taṁ passati tena passati; tena vata re vattabbe— “puggalo upalabbhati saccikaṭṭhaparamatthenā”ti.