Akusalena cittena samuṭṭhitaṁ rūpāyatanaṁ abyākatanti? Āmantā. Akusalena cittena samuṭṭhitaṁ vacīkammaṁ rūpaṁ abyākatanti? Na hevaṁ vattabbe …pe… akusalena cittena samuṭṭhitaṁ saddāyatanaṁ …pe… gandhāyatanaṁ … rasāyatanaṁ … phoṭṭhabbāyatanaṁ …pe… pathavīdhātu … āpodhātu … tejodhātu …pe… vāyodhātu asuci assu lohitaṁ sedo abyākatoti? Āmantā. Akusalena cittena samuṭṭhitaṁ vacīkammaṁ rūpaṁ abyākatanti? Na hevaṁ vattabbe …pe…. Akusalena cittena samuṭṭhitaṁ vacīkammaṁ rūpaṁ anārammaṇaṁ akusalanti? Āmantā. Akusalena cittena samuṭṭhitaṁ rūpāyatanaṁ anārammaṇaṁ akusalanti? Na hevaṁ vattabbe …pe… akusalena cittena samuṭṭhitaṁ vacīkammaṁ rūpaṁ anārammaṇaṁ akusalanti? Āmantā. Akusalena cittena samuṭṭhitaṁ saddāyatanaṁ …pe… gandhāyatanaṁ …pe… rasāyatanaṁ …pe… phoṭṭhabbāyatanaṁ … pathavīdhātu … āpodhātu … tejodhātu …pe… vāyodhātu asuci assu lohitaṁ sedo anārammaṇo akusaloti? Na hevaṁ vattabbe …pe….