Bodhisatto issariyakāmakārikāhetu gabbhaseyyaṁ okkamatīti? Āmantā. Bodhisatto iddhimāti? Na hevaṁ vattabbe …pe… bodhisatto iddhimāti? Āmantā. Bodhisattena chandiddhipādo bhāvito …pe… vīriyiddhipādo …pe… cittiddhipādo …pe… vīmaṁsiddhipādo bhāvitoti? Na hevaṁ vattabbe …pe…. Bodhisatto issariyakāmakārikāhetu gabbhaseyyaṁ okkamatīti? Āmantā. “Bodhisatto issariyakāmakārikāhetu gabbhaseyyaṁ okkamatī”ti— attheva suttantoti? Natthi. Hañci “bodhisatto issariyakāmakārikāhetu gabbhaseyyaṁ okkamatī”ti— nattheva suttanto, no ca vata re vattabbe— “bodhisatto issariyakāmakārikāhetu gabbhaseyyaṁ okkamatī”ti. Bodhisatto issariyakāmakārikāhetu dukkarakārikaṁ akāsīti? Āmantā. Bodhisatto issariyakāmakārikāhetu “sassato loko”ti paccāgacchi, “asassato loko”ti …pe… “antavā loko”ti …pe… “anantavā loko”ti … “taṁ jīvaṁ taṁ sarīran”ti … “aññaṁ jīvaṁ aññaṁ sarīran”ti … “hoti tathāgato paraṁ maraṇā”ti … “na hoti tathāgato paraṁ maraṇā”ti … “hoti ca na ca hoti tathāgato paraṁ maraṇā”ti …pe… “neva hoti na na hoti tathāgato paraṁ maraṇā”ti paccāgacchīti? Na hevaṁ vattabbe …pe….