“Na ukkhipe no ca parikkhipe pare, Na okkhipe pāragataṁ na eraye; Na cattavaṇṇaṁ parisāsu byāhare, Anuddhato sammitabhāṇi subbato. Susukhumanipuṇatthadassinā, Matikusalena nivātavuttinā; Saṁsevitavuddhasīlinā, Nibbānaṁ na hi tena dullabhan”ti. … Visākho pañcālaputto thero …. Dukanipāta Pañcamavagga Cūḷakattheragāthā “Nadanti morā susikhā supekhuṇā, Sunīlagīvā sumukhā sugajjino; Susaddalā cāpi mahāmahī ayaṁ, Subyāpitambu suvalāhakaṁ nabhaṁ. Sukallarūpo sumanassa jhāyataṁ, Sunikkamo sādhu subuddhasāsane; Susukkasukkaṁ nipuṇaṁ sududdasaṁ, Phusāhi taṁ uttamamaccutaṁ padan”ti. … Cūḷako thero …. Dukanipāta Pañcamavagga Anūpamattheragāthā “Nandamānāgataṁ cittaṁ, sūlamāropamānakaṁ; Tena teneva vajasi, yena sūlaṁ kaliṅgaraṁ. Tāhaṁ cittakaliṁ brūmi, taṁ brūmi cittadubbhakaṁ; Satthā te dullabho laddho, mānatthe maṁ niyojayī”ti. … Anūpamo thero …. Dukanipāta Pañcamavagga Vajjitattheragāthā