Amajjapo no ca musā abhāṇiṁ, Sakena dārena ca tuṭṭho ahosiṁ; Annañca pānañca pasannacitto, Sakkacca dānaṁ vipulaṁ adāsiṁ. Tena metādiso vaṇṇo, …pe… vaṇṇo ca me sabbadisā pabhāsatī”ti. Dutiyanāgavimānaṁ ekādasamaṁ. Purisavimāna Mahārathavagga

12. Tatiyanāgavimānavatthu

“Ko nu dibbena yānena, sabbasetena hatthinā; Tūriyatāḷitanigghoso, antalikkhe mahīyati. Devatā nusi gandhabbo, adu sakko purindado; Ajānantā taṁ pucchāma, kathaṁ jānemu taṁ mayan”ti. “Namhi devo na gandhabbo, nāpi sakko purindado; Sudhammā nāma ye devā, tesaṁ aññataro ahan”ti. “Pucchāma devaṁ sudhammaṁ, Puthuṁ katvāna añjaliṁ; Kiṁ katvā mānuse kammaṁ, Sudhammaṁ upapajjatī”ti. “Ucchāgāraṁ tiṇāgāraṁ, vatthāgārañca yo dade; Tiṇṇaṁ aññataraṁ datvā, sudhammaṁ upapajjatī”ti. Tatiyanāgavimānaṁ dvādasamaṁ. Purisavimāna Mahārathavagga

13. Cūḷarathavimānavatthu

“Daḷhadhammā nisārassa, dhanuṁ olubbha tiṭṭhasi; Khattiyo nusi rājañño, adu luddo vanecaro”ti.