“Amitto mittavaṇṇena, yo te āsi kulūpako; Kāyassa bhedā duppañño, kiṁ nu pecca gatiṁ gato”ti. “Tassevāhaṁ pāpakammassa, sīse tiṭṭhāmi matthake; So ca paravisayaṁ patto, mameva paricārako. Yaṁ bhadante hadantaññe, etaṁ me hoti bhojanaṁ; Ahañca kho yaṁ hadāmi, etaṁ so upajīvatī”ti. Gūthakhādakapetivatthu navamaṁ. Mahāvagga

10. Gaṇapetavatthu

“Naggā dubbaṇṇarūpāttha, kisā dhamanisanthatā; Upphāsulikā kisikā, ke nu tumhettha mārisā”ti. “Mayaṁ bhadante petāmhā, duggatā yamalokikā; Pāpakammaṁ karitvāna, petalokaṁ ito gatā”ti. “Kiṁ nu kāyena vācāya, manasā dukkaṭaṁ kataṁ; Kissa kammavipākena, petalokaṁ ito gatā”ti. “Anāvaṭesu titthesu, vicinimhaddhamāsakaṁ; Santesu deyyadhammesu, dīpaṁ nākamha attano. Nadiṁ upema tasitā, rittakā parivattati; Chāyaṁ upema uṇhesu, ātapo parivattati. Aggivaṇṇo ca no vāto, ḍahanto upavāyati; Etañca bhante arahāma, aññañca pāpakaṁ tato.