“Yathāpi bhaddo ājañño, khalitvā patitiṭṭhati; Evaṁ dassanasampannaṁ, sammāsambuddhasāvakan”ti. … Ramaṇīyavihāritthero …. Ekakanipāta Pañcamavagga Samiddhittheragāthā “Saddhāyāhaṁ pabbajito, Agārasmānagāriyaṁ; Sati paññā ca me vuḍḍhā, Cittañca susamāhitaṁ; Kāmaṁ karassu rūpāni, Neva maṁ byādhayissasī”ti. … Samiddhitthero …. Ekakanipāta Pañcamavagga Ujjayattheragāthā “Namo te buddha vīratthu, vippamuttosi sabbadhi; Tuyhāpadāne viharaṁ, viharāmi anāsavo”ti. … Ujjayo thero …. Ekakanipāta Pañcamavagga Sañjayattheragāthā “Yato ahaṁ pabbajito, Agārasmānagāriyaṁ; Nābhijānāmi saṅkappaṁ, Anariyaṁ dosasaṁhitan”ti. … Sañjayo thero …. Ekakanipāta Pañcamavagga Rāmaṇeyyakattheragāthā “Cihacihābhinadite, sippikābhirutehi ca; Na me taṁ phandati cittaṁ, ekattanirataṁ hi me”ti. … Rāmaṇeyyako thero …. Ekakanipāta Pañcamavagga Vimalattheragāthā “Dharaṇī ca siñcati vāti, Māluto vijjutā carati nabhe; Upasamanti vitakkā, Cittaṁ susamāhitaṁ mamā”ti. … Vimalo thero … vaggo pañcamo. Tassuddānaṁ