Ḍayhamāno na jānāti, ñātīnaṁ paridevitaṁ; Tasmā etaṁ na rodāmi, gato so tassa yā gatī”ti. Uragapetavatthu dvādasamaṁ. Uragavaggo paṭhamo. Tassuddānaṁ Khettañca sūkaraṁ pūti, piṭṭhaṁ cāpi tirokuṭṭaṁ; Pañcāpi sattaputtañca, goṇaṁ pesakārakañca; Tathā khallāṭiyaṁ nāgaṁ, dvādasaṁ uragañcevāti. Ubbarivagga

1. Saṁsāramocakapetivatthu

“Naggā dubbaṇṇarūpāsi, kisā dhamanisanthatā; Upphāsulike kisike, kā nu tvaṁ idha tiṭṭhasī”ti. “Ahaṁ bhadante petīmhi, duggatā yamalokikā; Pāpakammaṁ karitvāna, petalokaṁ ito gatā”ti. “Kiṁ nu kāyena vācāya, manasā dukkaṭaṁ kataṁ; Kissa kammavipākena, petalokaṁ ito gatā”ti. “Anukampakā mayhaṁ nāhesuṁ bhante, Pitā ca mātā athavāpi ñātakā; Ye maṁ niyojeyyuṁ dadāhi dānaṁ, Pasannacittā samaṇabrāhmaṇānaṁ.