“Veḷuriyathambhaṁ ruciraṁ pabhassaraṁ, Vimānamāruyha anekacittaṁ; Tatthacchasi devi mahānubhāve, Pathaddhani pannaraseva cando. Vaṇṇo ca te kanakassa sannibho, Uttattarūpo bhusa dassaneyyo; Pallaṅkaseṭṭhe atule nisinnā, Ekā tuvaṁ natthi ca tuyha sāmiko. Imā ca te pokkharaṇī samantā, Pahūtamalyā bahupuṇḍarīkā; Suvaṇṇacuṇṇehi samantamotthatā, Na tattha paṅko paṇako ca vijjati. Haṁsā cime dassanīyā manoramā, Udakasmimanupariyanti sabbadā; Samayya vaggūpanadanti sabbe, Bindussarā dundubhīnaṁva ghoso.