“Gantvā mayaṁ sindhusovīrabhūmiṁ, Dhanatthikā uddayaṁ patthayānā; Yathāpayogā paripuṇṇacāgā, Kāhāma serīsamahaṁ uḷāran”ti. “Mā ceva serīsamahaṁ akattha, Sabbañca vo bhavissati yaṁ vadetha; Pāpāni kammāni vivajjayātha, Dhammānuyogañca adhiṭṭhahātha. Upāsako atthi imamhi saṅghe, Bahussuto sīlavatūpapanno; Saddho ca cāgī ca supesalo ca, Vicakkhaṇo santusito mutīmā. Sañjānamāno na musā bhaṇeyya, Parūpaghātāya na cetayeyya; Vebhūtikaṁ pesuṇaṁ no kareyya, Saṇhañca vācaṁ sakhilaṁ bhaṇeyya. Sagāravo sappatisso vinīto, Apāpako adhisīle visuddho; So mātaraṁ pitarañcāpi jantu, Dhammena poseti ariyavutti.