Tassā me ñātikulā dāsī, sadā mālābhihārati; Tāhaṁ bhagavato thūpe, sabbamevābhiropayiṁ. Uposathe cahaṁ gantvā, mālāgandhavilepanaṁ; Thūpasmiṁ abhiropesiṁ, pasannā sehi pāṇibhi. Tena kammena devinda, rūpaṁ mayhaṁ gatī ca me; Iddhī ca ānubhāvo ca, yaṁ mālaṁ abhiropayiṁ. Yañca sīlavatī āsiṁ, na taṁ tāva vipaccati; Āsā ca pana me devinda, sakadāgāminī siyan”ti. Visālakkhivimānaṁ navamaṁ. Itthivimāna Pāricchattakavagga

10. Pāricchattakavimānavatthu

“Pāricchattake koviḷāre, ramaṇīye manorame; Dibbamālaṁ ganthamānā, gāyantī sampamodasi. Tassā te naccamānāya, aṅgamaṅgehi sabbaso; Dibbā saddā niccharanti, savanīyā manoramā. Tassā te naccamānāya, aṅgamaṅgehi sabbaso; Dibbā gandhā pavāyanti, sucigandhā manoramā. Vivattamānā kāyena, yā veṇīsu piḷandhanā; Tesaṁ suyyati nigghoso, tūriye pañcaṅgike yathā. Vaṭaṁsakā vātadhutā, vātena sampakampitā; Tesaṁ suyyati nigghoso, tūriye pañcaṅgike yathā.