Nābhinandāmi maraṇaṁ, nābhinandāmi jīvitaṁ; Kālañca paṭikaṅkhāmi, nibbisaṁ bhatako yathā. Nābhinandāmi maraṇaṁ, nābhinandāmi jīvitaṁ; Kālañca paṭikaṅkhāmi, sampajāno patissato”ti. … Saṅkicco thero … Ekādasakanipāto niṭṭhito. Tatruddānaṁ Saṅkiccathero ekova, katakicco anāsavo; Ekādasanipātamhi, gāthā ekādaseva cāti. Dvādasakanipāta Paṭhamavagga Sīlavattheragāthā “Sīlamevidha sikkhetha, asmiṁ loke susikkhitaṁ; Sīlañhi sabbasampattiṁ, upanāmeti sevitaṁ. Sīlaṁ rakkheyya medhāvī, patthayāno tayo sukhe; Pasaṁsaṁ vittilābhañca, pecca sagge pamodanaṁ. Sīlavā hi bahū mitte, saññamenādhigacchati; Dussīlo pana mittehi, dhaṁsate pāpamācaraṁ. Avaṇṇañca akittiñca, dussīlo labhate naro; Vaṇṇaṁ kittiṁ pasaṁsañca, sadā labhati sīlavā.