Yaṁ maggaṁ maggādhipatī adesayi, Brahmassaro kañcanasannibhattaco; Saṅghassa dānāni dadātha vittā, Mahapphalā yattha bhavanti dakkhiṇā. Ye puggalā aṭṭha sataṁ pasatthā, Cattāri etāni yugāni honti; Te dakkhiṇeyyā sugatassa sāvakā, Etesu dinnāni mahapphalāni. Cattāro ca paṭipannā, cattāro ca phale ṭhitā; Esa saṅgho ujubhūto, paññāsīlasamāhito. Yajamānānaṁ manussānaṁ, puññapekkhāna pāṇinaṁ; Karotaṁ opadhikaṁ puññaṁ, saṅghe dinnaṁ mahapphalaṁ. Eso hi saṅgho vipulo mahaggato, Esappameyyo udadhīva sāgaro; Etehi seṭṭhā naravīrasāvakā, Pabhaṅkarā dhammamudīrayanti. Tesaṁ sudinnaṁ suhutaṁ suyiṭṭhaṁ, Ye saṅghamuddissa dadanti dānaṁ; Sā dakkhiṇā saṅghagatā patiṭṭhitā, Mahapphalā lokavidūna vaṇṇitā.