Taṁ tyāhaṁ nārada brūmi, Sāmaṁ diṭṭhamidaṁ tayā; Mākāsi mukhasā pāpaṁ, Mā kho sūkaramukho ahū”ti. Sūkaramukhapetavatthu dutiyaṁ. Uragavagga

3. Pūtimukhapetavatthu

“Dibbaṁ subhaṁ dhāresi vaṇṇadhātuṁ, Vehāyasaṁ tiṭṭhasi antalikkhe; Mukhañca te kimayo pūtigandhaṁ, Khādanti kiṁ kammamakāsi pubbe”. “Samaṇo ahaṁ pāpotiduṭṭhavāco, Tapassirūpo mukhasā asaññato; Laddhā ca me tapasā vaṇṇadhātu, Mukhañca me pesuṇiyena pūti. Tayidaṁ tayā nārada sāmaṁ diṭṭhaṁ, Anukampakā ye kusalā vadeyyuṁ; ‘Mā pesuṇaṁ mā ca musā abhāṇi, Yakkho tuvaṁ hohisi kāmakāmī’”ti. Pūtimukhapetavatthu tatiyaṁ. Uragavagga

4. Piṭṭhadhītalikapetavatthu

“Yaṁ kiñcārammaṇaṁ katvā, dajjā dānaṁ amaccharī; Pubbapete ca ārabbha, atha vā vatthudevatā.