Sā devatā attamanā, …pe… yassa kammassidaṁ phalaṁ. “Nīluppalahatthakaṁ ahamadāsiṁ, Bhikkhuno piṇḍāya carantassa; Esikānaṁ uṇṇatasmiṁ, Nagaravare paṇṇakate ramme. Tena metādiso vaṇṇo, …pe… Vaṇṇo ca me sabbadisā pabhāsatī”ti. “Abhikkantena vaṇṇena, …pe… Vaṇṇo ca te sabbadisā pabhāsatī”ti. Sā devatā attamanā, …pe… yassa kammassidaṁ phalaṁ. “Odātamūlakaṁ haritapattaṁ, Udakasmiṁ sare jātaṁ ahamadāsiṁ; Bhikkhuno piṇḍāya carantassa, Esikānaṁ uṇṇatasmiṁ; Nagaravare paṇṇakate ramme. Tena metādiso vaṇṇo, …pe… Vaṇṇo ca me sabbadisā pabhāsatī”ti.