Tassa kañcanavaṇṇassa, dvipadindassa tādino; Pañca sūcī mayā dinnā, sibbanatthāya cīvaraṁ. Teneva sūcidānena, nipuṇatthavipassakaṁ; Tikkhaṁ lahuñca phāsuñca, ñāṇaṁ me udapajjatha. Kilesā jhāpitā mayhaṁ, bhavā sabbe samūhatā; Dhāremi antimaṁ dehaṁ, sammāsambuddhasāsane. Dvipadādhipatī nāma, rājāno caturo ahuṁ; Sattaratanasampannā, cakkavattī mahabbalā. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā sūcidāyako thero imā gāthāyo abhāsitthāti. Sūcidāyakattherassāpadānaṁ sattamaṁ. Nāgasamālavagga Pāṭalipupphiyattheraapadāna “Suvaṇṇavaṇṇaṁ sambuddhaṁ, Gacchantaṁ antarāpaṇe; Kañcanagghiyasaṅkāsaṁ, Bāttiṁsavaralakkhaṇaṁ. Seṭṭhiputto tadā āsiṁ, sukhumālo sukhedhito; Ucchaṅge pāṭalipupphaṁ, katvāna abhisaṁhariṁ.