Sahassarājanāmena, tayo te cakkavattino; Pañcasaṭṭhikappasate, cāturantā janādhipā. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā udakapūjako thero imā gāthāyo abhāsitthāti. Udakapūjakattherassāpadānaṁ chaṭṭhaṁ. Bhikkhadāyivagga Naḷamāliyattheraapadāna “Padumuttarabuddhassa, lokajeṭṭhassa tādino; Tiṇatthare nisinnassa, upasantassa tādino. Naḷamālaṁ gahetvāna, bandhitvā bījaniṁ ahaṁ; Buddhassa upanāmesiṁ, dvipadindassa tādino. Paṭiggahetvā sabbaññū, bījaniṁ lokanāyako; Mama saṅkappamaññāya, imaṁ gāthaṁ abhāsatha. ‘Yathā me kāyo nibbāti, pariḷāho na vijjati; Tatheva tividhaggīhi, cittaṁ tava vimuccatu’. Sabbe devā samāgacchuṁ, ye keci vananissitā; Sossāma buddhavacanaṁ, hāsayantañca dāyakaṁ.