ปารํ สมุทฺทํ ปตฺเถติ โอนตฺตา หิ น ปูรติ ฯ

เอกเมกาย อิตฺถิยา อฏฺฐฏฺฐ ปติโน สิยุํ ๑

สูรา จ พลวนฺโต จ สพฺพกามรสาหรา

กเรยฺย นวเม ฉนฺทํ โอนตฺตา หิ น ปูรติ ฯ

สพฺพิตฺถิโย สิขีริว สพฺพภกฺขา

สพฺพิตฺถิโย นทีริว สพฺพวาหินี

สพฺพิตฺถิโย กณฺฏกานํว สาขา

สพฺพิตฺถิโย ธนเหตุ วชนฺติ ฯ

วาตญฺจ ชาเลน นโร ปรามเส

โอสิญฺจเย สาครเมกปาณินา

สเกน หตฺเถน หเนยฺย ๒ โฆสํ

โย สพฺพภาวํ ปมทาสุ โอสฺสเช ฯ(

โจรีนํ พหุพุทฺธีนํ ยาสุ สจฺจํ สุทุลฺลภํ

ถีนํ ภาโว ทุราชาโน มจฺฉสฺเสโวทเก คตํ ฯ

อนลา มุทุสมฺภาสา ทุปฺปูรา ตา นทีสมา

สีทนฺติ นํ วิทิตฺวาน อารกา ปริวชฺชเย ฯ

อาวฏฺฏนี มหามายา พฺรหฺมจริยวิโกปนา

สีทนฺติ นํ วิทิตฺวาน อารกา ปริวชฺชเย ฯ

ยญฺเจตา อุปเสวนฺติ ฉนฺทสา วา ธเนน วา

ชาตเวโทว สณฺฐานํ ขิปฺปํ อนุทหนฺติ นนฺติ ฯ #๑ ม. สิยา ฯ ๒ ม. กเรยฺย ฯ