รุกฺขคฺเคสุ มหานิธิ โสฬเสเต มหานิธี
สหสฺสถาโม ปลฺลงฺโก สีวลาราธเนน จ ฯ
[๔๕๐] อาสึเสเถว ๑ ปุริโส น นิพฺพินฺเทยฺย ปณฺฑิโต
ปสฺสามิ โวหํ อตฺตานํ ยถา อิจฺฉึ ตถา อหุ ฯ
อาสึเสเถว ๑ ปุริโส น นิพฺพินฺเทยฺย ปณฺฑิโต
ปสฺสามิ โวหํ อตฺตานํ อุทกา ถลมุพฺภตํ ฯ
วายเมเถว ปุริโส น นิพฺพินฺเทยฺย ปณฺฑิโต
ปสฺสามิ โวหํ อตฺตานํ ยถา อิจฺฉึ ตถา อหุ ฯ
วายเมเถว ปุริโส น นิพฺพินฺเทยฺย ปณฺฑิโต
ปสฺสามิ โวหํ อตฺตานํ อุทกา ถลมุพฺภตํ ฯ
ทุกฺขูปนีโตปิ นโร สปญฺโญ
อาสํ น ฉินฺเทยฺย สุขาคมาย
พหู หิ ผสฺสา อหิตา หิตา จ
อวิตกฺกิตาโร มจฺจุมุปฺปชฺชนฺติ ๒ ฯ
อจินฺติตมฺปิ ภวติ จินฺติตมฺปิ วินสฺสติ
น หิ จินฺตามยา โภคา อิตฺถิยา ปุริสสฺส วา ฯ
[๔๕๑] อโปราณํ ๓ วต โภ ราชา สพฺพภุมฺโม ทิสํปติ
นาชฺช นจฺเจ นิสาเมติ น คีเต กุรุเต มโน ฯ
น มิเค นปิ อุยฺยาเน นปิ หํเส อุทิกฺขติ
มูโคว ตุณฺหีมาสีโน น อตฺถมนุสาสติ ฯ #๑ ม. อาสีเสเถว ฯ ๒ ม. อวิตกฺกิตา มจฺจุมุปพฺพชนฺติ ฯ ๓ สี. ยุ. อปุราณํ ฯ