[๗๒๗] มมํ ทิสฺวาน อายนฺตํ สพฺพกามสมิทฺธินํ

อินฺทฺริยานิ อหฏฺฐานิ สาวํ ชาตํ มุขํ ตว ฯ

ปทุมํ ยถา หตฺถคตํ ปาณินา ปริมทฺทิตํ

สาวํ ชาตํ มุขํ ตุยฺหํ มมํ ทิสฺวาน เอทิสํ ฯ

[๗๒๘] กจฺจิ นุ เต นาภิสฺสสิ กจฺจิ เต อตฺถิ เวทนา

เยน สาวํ มุขํ ตุยฺหํ มมํ ทิสฺวาน อาคตํ ฯ

[๗๒๙] สุปินํ ตาต อทฺทกฺขึ อิโต มาสํ อโธคตํ

ทกฺขิณํ วิย เม พาหุํ เฉตฺวา รุหิรมกฺขิตํ

ปุริโส อาทาย ปกฺกามิ มม โรทนฺติยา สติ ฯ

ยโตหํ สุปินมทฺทกฺขึ สุทสฺสน วิชานาหิ

ตโต ทิวา วา รตฺตึ วา สุขํ เม โนปลพฺภติ ฯ

[๗๓๐] ยํ ปุพฺเพ ปริวารึสุ ๑ กญฺญา รุจิรวิคฺคหา

เหมชาลปฏิจฺฉนฺนา ภูริทตฺโต น ทิสฺสติ ฯ

ยํ ปุพฺเพ ปริวารึสุ ๑ เนตฺตึสวรธาริโน

กณิการาว สมฺผุลฺลา ภูริทตฺโต น ทิสฺสติ ฯ

หนฺททานิ คมิสฺสาม ภูริทตฺตนิเวสนํ

ธมฺมฏฺฐํ สีลสมฺปนฺนํ ปสฺสาม ตว ภาตรํ ฯ

[๗๓๑] ตญฺจ ทิสฺวาน อายนฺตํ ภูริทตฺตสฺส มาตรํ

พาหา ปคฺคยฺห ปกฺกนฺทุํ ภูริทตฺตสฺส ภริยาโย ฯ

ปุตฺตนฺเตยฺเย น ชานาม อิโต มาสํ อโธคตํ #๑ สี. ยุ. ปริจารึสุ ฯ