[๒๖๗] อสู พฺรหารญฺญจโร มหามุนิ

นาทตฺวา ภตฺตํ วรคตฺเต ภุญฺชติ

วิเจยฺย ทานานิ ททาติ โกสิโย

ยสฺสา หิ โส ทสฺสติ สาว เสยฺยสิ ฯ

[๒๖๘] อสู หิ โส สมฺมติ ทกฺขิณํ ทิสํ

คงฺคาย ตีเร หิมวนฺตปสฺสินิ ๑

ส โกสิโย ทุลฺลภปานโภชโน

ตสฺส สุธํ ปาปย เทวสารถิ ฯ

[๒๖๙] โส มาตลิ เทววเรน เปสิโต

สหสฺสยุตฺตํ อภิรุยฺห สนฺทนํ

สุขิปฺปเมว อุปคมฺม อสฺสมํ

อทิสฺสมาโน มุนิโน สุธํ อทา ฯ

[๒๗๐] อุทคฺคิหุตฺตํ อุปติฏฺฐโต หิ เม

ปภงฺกรํ โลกตโมนุทุตฺตมํ

สพฺพานิ ภูตานิ อธิจฺจ ๒ วาสโว

โก เนว เม ปาณิสุ กึ สุโธทหิ ฯ

สงฺขูปมํ เสตมตุลฺยทสฺสนํ

สุจึ สุคนฺธํ ปิยรูปมพฺภุตํ

อทิฏฺฐปุพฺพํ มม ชาตจกฺขุภิ ๓

กา เทวตา ปาณิสุ กึ สุโธทหิ ฯ

#๑ ม. -ปสฺสนิ ฯ สี. ยุ. -ปสฺมนิ ฯ ๒ สี. ยุ. อติจฺจ ฯ ๓ ม. ชาตุ จกฺขุภิ ฯ