ยตฺถ เวสฺสนฺตโร ราชา สห ปุตฺเตหิ สมฺมติ

ธาเรนฺโต พฺราหฺมณวณฺณํ อาสทญฺจ มสญฺชฏํ

จมฺมวาสี ฉมา เสติ ชาตเวทํ นมสฺสติ ฯ

[๑๑๔๑] อิทญฺจ เม สตฺตุภตฺตํ มธุนา ปฏิสํยุตํ

มธุปิณฺฑิกา จ สุกตาโย สตฺตุภตฺตํ ททามิ เต ฯ

[๑๑๔๒] ตุเยฺหว สมฺพลํ โหตุ นาหํ อิจฺฉามิ สมฺพลํ

อิโตปิ พฺรเหฺม คณฺหาหิ คจฺฉ พฺรเหฺม ยถาสุขํ ฯ

อยํ เอกปที เอติ อุชุํ คจฺฉติ อสฺสมํ

อิสีปิ อจฺจุโต ตตฺถ ปงฺกทนฺโต รชสฺสิโร

ธาเรนฺโต พฺราหฺมณวณฺณํ อาสทญฺจ มสญฺชฏํ ฯ

จมฺมวาสี ฉมา เสติ ชาตเวทํ นมสฺสติ

ตํ ตฺวํ คนฺตฺวาน ปุจฺฉสฺสุ โส เต มคฺคํ ปวกฺขติ ฯ

[๑๑๔๓] อิทํ สุตฺวา พฺรหฺมพนฺธุ เจตํ กตฺวา ปทกฺขิณํ

อุทคฺคจิตฺโต ปกฺกามิ เยนาสิ อจฺจุโต อิสิ ฯ

จุลฺลวนวณฺณนา ๑ ฯ

[๑๑๔๔] คจฺฉนฺโต โส ภารทฺวาโช อทฺทส อจฺจุตํ อิสึ

ทิสฺวาน ตํ ภารทฺวาโช สมฺโมทิ อิสินา สห ฯ

กจฺจิ นุ โภโต กุสลํ กจฺจิ โภโต อนามยํ

กจฺจิ อุญฺเฉน ยาเปถ กจฺจิ มูลผลา พหู ฯ

กจฺจิ ฑํสา มกสา จ อปฺปเมว สิรึสปา ๒ #๑ ม. จูฬวนวณฺณา ฯ ๒ ม. สริสปา ฯ อิโต ปรํ อีทิสเมว ฯ