นานารตนปริปูรํ นิจฺเฉ เวสฺสนฺตรํ วินา ฯ

กถนฺนุ ตาสํ หทยํ สุขรา วต อิตฺถิโย

ยา สามิเก ทุกฺขิตมฺหิ สุขมิจฺฉนฺติ อตฺตโน ฯ

นิกฺขมนฺเต มหาราเช สิวีนํ รฏฺฐวฑฺฒเน

ตมหํ อนุพนฺธิสฺสํ สพฺพกามทโท หิ เม ฯ

[๑๐๙๔] ตมพฺรวี มหาราชา มทฺทึ สพฺพงฺคโสภนํ

อิเม เต ทหรา ปุตฺตา ชาลี กณฺหาชินา จุโภ

นิกฺขิปฺป ลกฺขเณ คจฺฉ มยนฺเต โปสยามเส ฯ

[๑๐๙๕] ตมพฺรวี ราชปุตฺตี มทฺที สพฺพงฺคโสภนา

ปิยา เม ปุตฺตกา เทว ชาลี กณฺหาชินา จุโภ

ตฺยมฺหํ ตตฺถ รมิสฺสนฺติ อรญฺเญ ชีวิโสกินํ ฯ

[๑๐๙๖] ตมพฺรวี มหาราชา สิวีนํ รฏฺฐวฑฺฒโน

สาลีนโมทนํ ภุตฺวา สุจิมํสูปเสจนํ

รุกฺขผลานิ ภุญฺชนฺตา กถํ กาหนฺติ ทารกา ฯ

ภุตฺวา สตปเล กํเส โสวณฺเณ สตราชิเก

รุกฺขปตฺเตสุ ภุญฺชนฺตา กถํ กาหนฺติ ทารกา ฯ

กาสิยานิ จ ธาเรตฺวา โขมโกทุมฺพรานิ จ

กุสจีรานิ ธาเรนฺตา กถํ กาหนฺติ ทารกา ฯ

วยฺหาหิ ปริยายิตฺวา สิวิกาย รเถน จ

ปตฺติกา ปริธาวนฺตา กถํ กาหนฺติ ทารกา ฯ