[๕๘๓] ปภาสติมิทํ พฺยมฺหํ เวฬุริยาสุ นิมฺมิตํ
อุเปตํ ภูมิภาเคหิ วิภตฺตํ ภาคโส มิตํ
อาลมฺพรา มุทิงฺคา จ นจฺจคีตา สุวาทิตา
ทิพฺพา สทฺทา นิจฺฉรนฺติ สวนียา มโนรมา
นาหํ เอวํ คตํ ชาตุ เอวํ สุรุจิรํ ปุเร
สทฺทํ สมภิชานามิ ทิฏฺฐํ วา ยทิวา สุตํ ฯ
วิตฺตี หิ มํ วินฺทติ สูต ทิสฺวา
ปุจฺฉามิ ตํ มาตลิ เทวสารถิ
อยํ นุ มจฺโจ กิมกาสิ สาธุํ
โย โมทติ สคฺคปฺปตฺโต วิมาเน ฯ
[๕๘๔] ตสฺส ปุฏฺโฐ วิยากาสิ มาตลิ เทวสารถิ
วิปากํ ปุญฺญกมฺมานํ ชานํ อกฺขาสิชานโต ฯ
พาราณสิยํ คหปติ เอส ทานปตี อหุ
อาราเม อุทปาเน จ ปปา สงฺกมนานิ จ
อรหนฺเต สีติภูเต สกฺกจฺจํ ปฏิปาทยิ
จีวรํ ปิณฺฑปาตญฺจ ปจฺจยํ สยนาสนํ
อทาสิ อุชุภูเตสุ วิปฺปสนฺเนน เจตสา ฯ
จาตุทฺทสึ ปญฺจทสึ ยา จ ปกฺขสฺส อฏฺฐมี
ปาฏิหาริยปกฺขญฺจ อฏฺฐงฺคสุสมาหิตํ
อุโปสถํ อุปวสิ สทา สีเลสุ สํวุโต