กจฺจิ นุ ตาต เม มาตุ จกฺขุ น ปริหายติ ฯ

[๑๒๕๑] กุสลญฺเจว เม ปุตฺต อโถ ปุตฺต อนามยํ

อโถ จ ปุตฺต เต มาตุ จกฺขุ น ปริหายติ ฯ

[๑๒๕๒] กจฺจิ อโรคํ โยคฺคนฺเต กจฺจิ วหติ วาหนํ

กจฺจิ ผีโต ชนปโท กจฺจิ วุฏฺฐิ น ฉิชฺชติ ฯ

[๑๒๕๓] อโถ อโรคํ โยคฺคมฺเม อโถ วหติ วาหนํ

อโถ ผีโต ชนปโท อโถ วุฏฺฐิ น ฉิชฺชติ ฯ

[๑๒๕๔] อิจฺเจวํ มนฺตยนฺตานํ มาตา เนสํ อทิสฺสถ

ราชปุตฺตี คิริทฺวาเร ปตฺติกา อนุปาหนา ฯ

ตญฺจ ทิสฺวาน อายนฺตึ มาตรํ ปุตฺตคิทฺธินึ

เวสฺสนฺตโร จ มทฺที จ ปจฺจุคฺคนฺตฺวา อวนฺทิสุํ ฯ

มทฺที จ สิรสา ปาเท สสฺสุยา อภิวาทยิ

มทฺที อหญฺหิ เต อยฺเย ปาเท วนฺทามิ เต หุสา ฯ

[๑๒๕๕] มทฺทิญฺจ ปุตฺตกา ทิสฺวา ทูรโต โสตฺถิมาคตา

กนฺทนฺตา อภิธาวึสุ วจฺฉา พาลาว มาตรํ ฯ

มทฺที จ ปุตฺตเก ทิสฺวา ทูรโต โสตฺถิมาคเต

วารุณีว ปเวเธนฺติ ถนธาราภิสิญฺจถ ฯ

[๑๒๕๖] สมาคตาน ญาตีนํ มหาโฆโส อชายถ

ปพฺพตา สมนาทึสุ มหี อากมฺปิตา อหุ

วุฏฺฐิธารํ ปวตฺเตนฺโต เทโว ปาวสฺสิ ตาวเท ฯ