กจฺจิ ปิตา อโรคา เต สิวีนญฺจ อนามยํ

โก เต พลํ มหาราช โก นุ เต รถมณฺฑลํ ฯ

อนสฺสโก อรถโก ทีฆมทฺธานมาคโต

กจฺจามิตฺเตหิ ปกโต อนุปฺปตฺโตสิมํ ทิสํ ฯ

[๑๑๑๔] กุสลญฺเจว เม สมฺมา อโถ สมฺมา อนามยํ

อโถ ปิตา อโรคา เม สิวีนญฺจ อนามยํ ฯ

อหํ หิ กุญฺชรํ ทชฺชํ อีสาทนฺตํ อุรุฬฺหวํ

เขตฺตญฺญญ สพฺพยุทฺธานํ สพฺพเสตํ คชุตฺตมํ ฯ

ปณฺฑุกมฺพลสญฺฉนฺนํ ปภินฺนํ สตฺตุมทฺทนํ

ทนฺตึ สวาลวีชนึ เสตํ เกลาสสาทิสํ ฯ

สเสตจฺฉตฺตํ สุปตฺเถยฺยํ ๑ สาถพฺพนํ สหตฺถิปํ

อคฺคยานํ ราชวาหึ พฺราหฺมณานํ อทาสหํ ฯ

ตสฺมึ เม สิวิโย กุทฺธา ปิตา จุปหโตมโน

อวรุทฺธสิ มํ ราชา วงฺกํ คจฺฉามิ ปพฺพตํ

โอกาสํ สมฺมา ชานาถ วเน ยตฺถ วเสมฺหเส ๒ ฯ

[๑๑๑๕] สฺวาคตนฺเต มหาราช อโถ เต อทุราคตํ

อิสฺสโรสิ อนุปฺปตฺโต ยํ อิธตฺถิ ปเวทย ฯ

สากํ ภึสํ มธุํ มํสํ สุทฺธํ สาลีนโมทนํ

ปริภุญฺช มหาราช ปาหุโน โนสิ อาคโต ฯ #๑ ม. สอุปาเธยฺยํ ฯ ๒ ม. วสามเส ฯ อิโต ปรํ อีทิสเมว ฯ