[๑๐๑๒] เอวญฺจ เต ลทฺธมิทํ วิมานํ

ชานาสิ ปุญฺญาน ผลูปปตฺตึ

ตสฺมา หิ ธมฺมญฺจร อปฺปมตฺโต

ยถา วิมานํ ปุน มาวเสสิ ฯ

[๑๐๑๓] นยีธ สนฺติ สมณพฺราหฺมณา จ

เยสนฺนปานานิ ทเทมุ กตฺเต

อกฺขาหิ เม ปุจฺฉิโต เอตมตฺถํ

ยถา วิมานํ ปุน มาวเสม ฯ

[๑๐๑๔] โภคี หิ เต สนฺติ อิธูปปนฺนา

ปุตฺตา จ ทารา อนุชีวิโน จ

เตลุ ตุวํ วจสา กมฺมุนา จ

อสมฺปทุฏฺโฐ จ ภวาหิ นิจฺจํ ฯ

เอวํ ตุวํ นาค อสมฺปโทสํ

อนุปาลย วจสา กมฺมุนา จ

ฐตฺวา อิธ ยาวตายุกํ วิมาเน

อุทฺธํ อิโต คจฺฉสิ เทวโลกํ ฯ

[๑๐๑๕] อทฺธา หิ โส โสจติ ราชเสฏฺโฐ

ตยา วินา ยสฺส ตุวํ สชิพฺโพ

ทุกฺขูปนีโตปิ ตยา สเมจฺจ

วินฺเทยฺย โปโส สุขมาตุโรปิ ฯ