อาทาย ปุตฺตทารญฺจ วงฺเก วสติ ปพฺพเต ฯ

อกิจฺจการี ทุมฺเมโธ รฏฺฐา วิวนมาคโต ๑

ราชปุตฺตํ คเวสนฺโต พโก มจฺฉมิโวทเก ฯ

ตสฺส ตฺยาหํ น ทสฺสามิ ชีวิตํ อิธ พฺราหฺมณ

อยํ หิ เต มยา นุนฺโน สโร ปาสฺสติ ๒ โลหิตํ ฯ

สิโร เต วชฺฌยิตฺวาน หทยํ เฉตฺวา สพนฺธนํ

ปนฺถสกุณํ ยชิสฺสามิ ตุยฺหํ มํเสน พฺราหฺมณ ฯ

ตุยฺหํ มํเสน เมเทน มตฺถเกน จ พฺราหฺมณ

อาหุตึ ปคฺคเหสฺสามิ เฉตฺวาน หทยํ ตว ฯ

ตํ เม สุยิฏฺฐํ สุหุตํ ตุยฺหํ มํเสน พฺราหฺมณ

น จ ตฺวํ ราชปุตฺตสฺส ภริยํ ปุตฺเต จ เนสฺสสิ ฯ

[๑๑๓๗] อวชฺโฌ พฺราหฺมโณ ทูโต เจตปุตฺต สุโณหิ เม

ตสฺมา หิ ทูตํ น หนฺติ เอส ธมฺโม สนนฺตโน ฯ

นิชฺฌตฺตา สิวิโย สพฺเพ ปิตา นํ ทฏฺฐุมิจฺฉติ

มาตา จ ทุพฺพลา ตสฺส อจิรา จกฺขูนิ ชียเร ฯ

เตสาหํ ปหิโต ทูโต เจตปุตฺต สุโณหิ เม

ราชปุตฺตํ นยิสฺสามิ ยทิ ชานาสิ สํส เม ฯ

[๑๑๓๘] ปิยสฺส เม ปิโย ทูโต ปุณฺณปตฺตํ ททามิ เต

อิมญฺจ มธุโน ตุมฺพํ มิคสตฺถิญฺจ พฺราหฺมณ #๑ ม. ปวนมาคโต ฯ ๒ ม. ปิสฺสติ ฯ