ตํ จนฺทนคนฺธรสานุลิตฺตํ

สุวณฺณชมฺโพนทนิกฺขสาทิสํ

ภริยํ อวจ เอหิ สุโณหิ โภติ

ปุตฺตานิ อามนฺตย ตมฺพเนตฺเต ฯ

สุตฺวาน วากฺยํ ปติโน อโนชา ๑

สุณิสํ อวจ ตมฺพนขึ สุเนตฺตํ

อามนฺตย จมฺมธรานิ ๒ เจเต

ปุตฺตานิ อินฺทีวรปุปฺผสาเม ฯ

[๙๕๖] เต อาคเต มุทฺธนิ ธมฺมปาโล

จุมฺพิตฺวา ปุตฺเต อวิกมฺปมาโน

อามนฺตยิตฺวาน อโวจ วากฺยํ

ทินฺโนหํ รญฺญา อิธ มาณวสฺส ฯ

ตสฺสชฺชหํ อตฺตสุขี วิเธยฺโย

อาทาย เยนิจฺฉติ เตน คจฺฉติ

อหญฺจ โว อนุสาสิตุํ อาคโตสฺมิ

กถํ อหํ อปริตฺตาย คจฺเฉ ฯ

สเจ โว ราชา กุรุรฏฺฐวาสี ๓

ชนสนฺโธ ปุจฺเฉยฺย ปหูตกาโม

กิมาภิชานาถ ปุเร ปุราณํ

กึ โว ปิตา อนุสาเส ปุรตฺถา ฯ

#๑ ม. อนุชฺชา ฯ ๒ ม. วมฺมธรานิ ฯ ๓ สี. ยุ. กุรุเขตฺตวาสี ฯ