รมฺมเก สิขเร ชาตํ สีตจฺฉายํ มโนรมํ ฯ

อถ ทกฺขสิ ภทฺทนฺเต นาลิกํ นาม ปพฺพตํ

นานาทิชคณากิณฺณํ เสลํ กึปุริสายุตํ ฯ

ตสฺส อุตฺตรปุพฺเพน มุจลินฺโท นาม โส สโร

ปุณฺฑรีเกหิ สญฺฉนฺโน เสตโสคนฺธิเยหิ จ ฯ

โส วนํ เมฆสงฺกาสํ ธุวํ หริตสทฺทลํ

สีโหวามิสเปกฺขีว วนสณฺฑํ วิคาหิย

ปุปฺผรุกฺเขหิ สญฺฉนฺนํ ผลรุกฺเขหิ จูภยํ ฯ

ตตฺถ พินฺทุสฺสรา วคฺคู นานาวณฺณา พหู ทิชา

กูชนฺตมุปกูชนฺติ อุตุสมฺปุปฺผิเต ทุเม ฯ

คนฺตฺวา คิริวิทุคฺคานิ นทีนํ ปภวานิ จ

โส อทฺทส ๑ โปกฺขรณึ กรญฺชกกุธายุตํ ฯ

ปุถุโลมมจฺฉากิณฺณํ สุปติตฺถํ มโหทกํ

สมญฺจ จตุรสฺสญฺจ สาธุํ อปฺปฏิคนฺธิยํ ฯ

ตสฺสา อุตฺตรปุพฺเพน ปณฺณสาลํ อมาปย

ปณฺณสาลํ อมาเปตฺวา อุญฺฉาจริยาย อีหถ ฯ

วนปฺปเวสนํ นาม ฯ

[๑๑๒๓] อหุ วาสี กลิงฺเคสุ ชูชโก นาม พฺราหฺมโณ

ตสฺสาปิ ทหรา ภริยา นาเมนามิตฺตตาปนา ฯ

ตา นํ ตตฺถ คตาโวจุํ นทีอุทกหาริยา

#๑ สี. ยุ. ทกฺขสิ ฯ