มุญฺชา อิสกา ปพฺยูฬฺหา ๑ เอกา วิหร สีวลีติ ฯ

มหาชนกชาตกํ ทุติยํ ฯ

_____________

๓ สุวณฺณสามชาตกํ

[๔๘๒] โก นุ มํ อุสุนา วิชฺฌิ ปมตฺตํ อุทหาริกํ ๒

ขตฺติโย พฺราหฺมโณ เวสฺโส โก มํ วิทฺธา นิลียสิ ฯ

น เม มํสานิ ขชฺชานิ จมฺเมนตฺโถ น วิชฺชติ

อถ เกน นุ วณฺเณน วิทฺเธยฺยํ มํ อมญฺญถ ฯ

โก วา ตฺวํ กสฺส วา ปุตฺโต กถํ ชาเนมุ ตํ มยํ

ปุฏฺโฐ เม สมฺม อกฺขาหิ กึ มํ วิทฺธา นิลียสิ ฯ

[๔๘๓] ราชาหมสฺมิ กาสีนํ ปิลยกฺโขติ มํ วิทู

โลภา รฏฺฐํ ปหิตฺวาน มิคเมสํ จรามหํ

อิสฺสตฺเถ จสฺมิ กุสโล ทฬฺหธมฺโมติ วิสฺสุโต

นาโคปิ เม น มุญฺเจยฺย อาคโต อุสุปาตนํ ฯ

โก วา ตฺวํ กสฺส วา ปุตฺโต ๓ กถํ ชาเนมุ ตํ มยํ

ปิตุโน อตฺตโน จาปิ นามโคตฺตํ ปเวทย ฯ

[๔๘๔] เนสาทปุตฺโต ภทฺทนฺเต สาโม อิติ มํ ญาตโย

อามนฺตยึสุ ชีวนฺตํ สฺวาชฺเชวงฺคโต ๔ สเย

วิทฺโธสฺมิ ปุถุสลฺเลน สวิเสน ยถา มิโค

สกมฺหิ โลหิเต ราช ปสฺส เสมิ ปริปฺลุโต #๑ ม. มุญฺชาเวสิกา ปวาฬฺหา ฯ ๒ ม. อุทหารกํ ฯ ๓ สี. ยุ. ตฺวํ จ กสฺส วา #ปุตฺโตสิ ฯ ๔ ม. สฺวชฺเชวาหํ คโต ฯ