อนฺตรายํปิ สา กยิรา คจฺฉญฺเญว รเถสภ ฯ

อามนฺตยสฺสุ เต ปุตฺเต มา เต มาตรมทฺทสุํ

สทฺธาย ทานํ ททโต เอวํ ปุญฺญํ ปวฑฺฒติ ฯ

อามนฺตยสฺสุ เต ปุตฺเต มา เต มาตรมทฺทสุํ

มาทิสสฺส ธนํ ทตฺวา ราช สคฺคํ คมิสฺสสิ ฯ

[๑๑๖๕] สเจ ตฺวํ นิจฺฉเส ทฏฺฐุํ มม ภริยํ ปติพฺพตํ

อยฺยกสฺสปิเม เทหิ ๑ ชาลึ กณฺหาชินํ จุโภ ฯ

อิเม กุมาเร ทิสฺวาน มญฺชุเก ปิยภาณิเน

ปตีโต สุมโน วิตฺโต พหุํ ทสฺสติ เต ธนํ ฯ

[๑๑๖๖] อจฺเฉทนสฺส ภายามิ ราชปุตฺต สุโณหิ เม

ราชทณฺฑาย มํ ทชฺชา วิกฺกีเณยฺย หเนยฺย วา

ฉินฺโน ๒ ธนญฺจ ทาเส จ คารยฺหสฺส พฺรหฺมพนฺธุยา ฯ

[๑๑๖๗] อิเม กุมาเร ทิสฺวาน มญฺชุเก ปิยภาณิเน

ธมฺเม ฐิโต มหาราชา สิวีนํ รฏฺฐวฑฺฒโน

ลทฺธา ปีติโสมนสฺสํ พหุํ ทสฺสติ เต ธนํ ฯ

[๑๑๖๘] นาหนฺตํปิ กริสฺสามิ ยํ มํ ตฺวํ อนุสาสสิ

ทารเกว อหํ เนสฺสํ พฺราหฺมณิยา ปริจาริเก ฯ

[๑๑๖๙] ตโต กุมารา พฺยตฺถิตา ๓ สุตฺวา ลุทฺทสฺส ภาสิตํ

เตน เตน ปธาวึสุ ชาลี กณฺหาชินา จุโภ ฯ

[๑๑๗๐] เอหิ ตาต ปิยปุตฺต ปูเรถ มม ปารมึ #๑ ม. อยฺยถสฺสปิ ทสฺเสหิ ฯ ๒ ม. ชิโน ฯ ๓ ม. พฺยถิตา ฯ สี. ยุ. พฺยธิตา ฯ