Hetuyā dasa, ārammaṇe dasa, adhipatiyā dasa, anantare samanantare sahajāte aññamaññe nissaye upanissaye purejāte āsevane kamme vipāke āhāre indriye jhāne magge sampayutte vippayutte atthiyā natthiyā vigate avigate sabbattha dasa. Evaṁ anulomagaṇanā gaṇetabbā. Anulomaṁ. 1.8.1.2. Paccayapaccanīya Vibhaṅgavāra Nahetu Pītisahagataṁ dhammaṁ paṭicca pītisahagato dhammo uppajjati nahetupaccayā— ahetukaṁ pītisahagataṁ ekaṁ khandhaṁ paṭicca tayo khandhā …pe… dve khandhe paṭicca dve khandhā. Pītisahagataṁ dhammaṁ paṭicca sukhasahagato dhammo uppajjati nahetupaccayā— ahetukaṁ pītisahagataṁ ekaṁ khandhaṁ paṭicca sukhasahagatā tayo khandhā …pe… dve khandhe paṭicca dve khandhā. Pītisahagataṁ dhammaṁ paṭicca pītisahagato ca sukhasahagato ca dhammā uppajjanti nahetupaccayā—ahetukaṁ pītisahagataṁ ekaṁ khandhaṁ paṭicca pītisahagatā ca sukhasahagatā ca tayo khandhā …pe… dve khandhe paṭicca dve khandhā. Sukhasahagataṁ dhammaṁ paṭicca sukhasahagato dhammo uppajjati nahetupaccayā— ahetukaṁ sukhasahagataṁ ekaṁ khandhaṁ paṭicca dve khandhā, dve khandhe paṭicca eko khandho.