Sekkhañca nevasekkhanāsekkhañca dhammaṁ paṭicca nevasekkhanāsekkho dhammo uppajjati naārammaṇapaccayā—sekkhe khandhe ca mahābhūte ca paṭicca cittasamuṭṭhānaṁ rūpaṁ. Asekkhañca nevasekkhanāsekkhañca dhammaṁ paṭicca nevasekkhanāsekkho dhammo uppajjati naārammaṇapaccayā—asekkhe khandhe ca mahābhūte ca paṭicca cittasamuṭṭhānaṁ rūpaṁ. Naadhipatyādi Sekkhaṁ dhammaṁ paṭicca sekkho dhammo uppajjati naadhipatipaccayā—sekkhe khandhe paṭicca sekkho adhipati. Asekkhaṁ dhammaṁ paṭicca asekkho dhammo uppajjati naadhipatipaccayā—asekkhe khandhe paṭicca asekkho adhipati. Nevasekkhanāsekkhaṁ dhammaṁ paṭicca nevasekkhanāsekkho dhammo uppajjati naadhipatipaccayā … (paripuṇṇaṁ, paṭisandhipi mahābhūtāpi sabbe) naanantarapaccayā … nasamanantarapaccayā … naaññamaññapaccayā … naupanissayapaccayā … napurejātapaccayā … satta (kusalattikasadisā) … napacchājātapaccayā …pe… naāsevanapaccayā. Vipākaṁ sekkhaṁ ekaṁ khandhaṁ paṭicca tayo khandhā …pe… dve khandhe …pe…. Sekkhaṁ dhammaṁ paṭicca nevasekkhanāsekkho dhammo uppajjati naāsevanapaccayā— sekkhe khandhe paṭicca cittasamuṭṭhānaṁ rūpaṁ. Sekkhaṁ dhammaṁ paṭicca sekkho ca nevasekkhanāsekkho ca dhammā uppajjanti naāsevanapaccayā—vipākaṁ sekkhaṁ ekaṁ khandhaṁ paṭicca tayo khandhā cittasamuṭṭhānañca rūpaṁ …pe… dve khandhe …pe…. Asekkhaṁ dhammaṁ paṭicca asekkho dhammo … tīṇi.