Atītārammaṇo dhammo atītārammaṇassa dhammassa anantarapaccayena paccayo— purimā purimā atītārammaṇā khandhā pacchimānaṁ pacchimānaṁ atītārammaṇānaṁ khandhānaṁ anantarapaccayena paccayo. Atītārammaṇo dhammo anāgatārammaṇassa dhammassa anantarapaccayena paccayo— atītārammaṇaṁ bhavaṅgaṁ anāgatārammaṇāya āvajjanāya anantarapaccayena paccayo. Atītārammaṇo dhammo paccuppannārammaṇassa dhammassa anantarapaccayena paccayo— atītārammaṇaṁ cuticittaṁ paccuppannārammaṇassa paṭisandhicittassa anantarapaccayena paccayo. Atītārammaṇaṁ bhavaṅgaṁ paccuppannārammaṇāya āvajjanāya anantarapaccayena paccayo. Anāgatārammaṇo dhammo anāgatārammaṇassa dhammassa anantarapaccayena paccayo— purimā purimā anāgatārammaṇā khandhā pacchimānaṁ pacchimānaṁ anāgatārammaṇānaṁ khandhānaṁ anantarapaccayena paccayo. Anāgatārammaṇo dhammo atītārammaṇassa dhammassa anantarapaccayena paccayo— anāgatārammaṇaṁ iddhividhañāṇaṁ atītārammaṇassa vuṭṭhānassa …pe… cetopariyañāṇaṁ atītārammaṇassa vuṭṭhānassa …pe… anāgataṁsañāṇaṁ atītārammaṇassa vuṭṭhānassa …pe… anāgatārammaṇā khandhā atītārammaṇassa vuṭṭhānassa anantarapaccayena paccayo.