Mahaggato dhammo mahaggatassa dhammassa kammapaccayena paccayo—sahajātā, nānākkhaṇikā. <b>Sahajātā</b>—mahaggatā cetanā sampayuttakānaṁ khandhānaṁ kammapaccayena paccayo. Paṭisandhikkhaṇe mahaggatā cetanā sampayuttakānaṁ khandhānaṁ kammapaccayena paccayo. <b>Nānākkhaṇikā</b>—mahaggatā cetanā vipākānaṁ mahaggatānaṁ khandhānaṁ kammapaccayena paccayo. Mahaggato dhammo parittassa dhammassa kammapaccayena paccayo—sahajātā, nānākkhaṇikā. <b>Sahajātā</b>—mahaggatā cetanā cittasamuṭṭhānānaṁ rūpānaṁ kammapaccayena paccayo. Paṭisandhikkhaṇe mahaggatā cetanā kaṭattārūpānaṁ kammapaccayena paccayo. <b>Nānākkhaṇikā</b>—mahaggatā cetanā kaṭattārūpānaṁ kammapaccayena paccayo. Mahaggato dhammo parittassa ca mahaggatassa ca dhammassa kammapaccayena paccayo—sahajātā, nānākkhaṇikā. <b>Sahajātā</b>—mahaggatā cetanā sampayuttakānaṁ khandhānaṁ cittasamuṭṭhānānañca rūpānaṁ kammapaccayena paccayo. Paṭisandhikkhaṇe mahaggatā cetanā sampayuttakānaṁ khandhānaṁ kaṭattā ca rūpānaṁ kammapaccayena paccayo. <b>Nānākkhaṇikā</b>—mahaggatā cetanā vipākānaṁ mahaggatānaṁ khandhānaṁ kaṭattā ca rūpānaṁ kammapaccayena paccayo. Appamāṇo dhammo appamāṇassa dhammassa kammapaccayena paccayo—sahajātā, nānākkhaṇikā. <b>Sahajātā</b>—appamāṇā cetanā sampayuttakānaṁ khandhānaṁ kammapaccayena paccayo. <b>Nānākkhaṇikā</b>—appamāṇā cetanā vipākānaṁ appamāṇānaṁ khandhānaṁ kammapaccayena paccayo.