Avitakkaavicāraṁ dhammaṁ paṭicca avitakkaavicāro dhammo uppajjati naārammaṇapaccayā—avitakkaavicāre khandhe paṭicca cittasamuṭṭhānaṁ rūpaṁ, vicāraṁ paṭicca cittasamuṭṭhānaṁ rūpaṁ. Paṭisandhikkhaṇe avitakkaavicāre khandhe paṭicca kaṭattārūpaṁ, vicāraṁ paṭicca kaṭattārūpaṁ, khandhe paṭicca vatthu, vicāraṁ paṭicca vatthu; ekaṁ mahābhūtaṁ paṭicca …pe… bāhiraṁ … āhārasamuṭṭhānaṁ … utusamuṭṭhānaṁ … asaññasattānaṁ ekaṁ mahābhūtaṁ paṭicca …pe…. Savitakkasavicārañca avitakkaavicārañca dhammaṁ paṭicca avitakkaavicāro dhammo uppajjati naārammaṇapaccayā—savitakkasavicāre khandhe ca mahābhūte ca paṭicca cittasamuṭṭhānaṁ rūpaṁ. Paṭisandhikkhaṇe savitakkasavicāre khandhe ca mahābhūte ca paṭicca kaṭattārūpaṁ. Avitakkavicāramattañca avitakkaavicārañca dhammaṁ paṭicca avitakkaavicāro dhammo uppajjati naārammaṇapaccayā—avitakkavicāramatte khandhe ca vicārañca paṭicca cittasamuṭṭhānaṁ rūpaṁ, avitakkavicāramatte khandhe ca mahābhūte ca paṭicca cittasamuṭṭhānaṁ rūpaṁ, vitakkañca mahābhūte ca paṭicca cittasamuṭṭhānaṁ rūpaṁ. Paṭisandhikkhaṇe avitakkavicāramatte khandhe ca vicārañca …pe… kaṭattārūpaṁ. Savitakkasavicārañca avitakkavicāramattañca dhammaṁ paṭicca avitakkaavicāro dhammo uppajjati naārammaṇapaccayā—savitakkasavicāre khandhe ca vitakkañca paṭicca cittasamuṭṭhānaṁ rūpaṁ. Paṭisandhikkhaṇe …pe….