Avitakkavicāramatto dhammo savitakkasavicārassa dhammassa adhipatipaccayena paccayo. <b>Ārammaṇādhipati</b>—avitakkavicāramattā jhānā vuṭṭhahitvā, maggā vuṭṭhahitvā, phalā vuṭṭhahitvā phalaṁ garuṁ katvā paccavekkhati; taṁ garuṁ katvā savitakkasavicārā khandhā uppajjanti. Avitakkavicāramatte khandhe ca vitakkañca garuṁ katvā assādeti abhinandati; taṁ garuṁ katvā rāgo uppajjati, diṭṭhi uppajjati. Avitakkavicāramatto dhammo avitakkaavicārassa dhammassa adhipatipaccayena paccayo. <b>Sahajātādhipati</b>—avitakkavicāramattā adhipati vicārassa cittasamuṭṭhānānañca rūpānaṁ adhipatipaccayena paccayo. Avitakkavicāramatto dhammo avitakkavicāramattassa ca avitakkaavicārassa ca dhammassa adhipatipaccayena paccayo. <b>Sahajātādhipati</b>—avitakkavicāramattā adhipati sampayuttakānaṁ khandhānaṁ vicārassa ca cittasamuṭṭhānānañca rūpānaṁ adhipatipaccayena paccayo. Avitakkavicāramatto dhammo savitakkasavicārassa ca avitakkavicāramattassa ca dhammassa adhipatipaccayena paccayo. <b>Ārammaṇādhipati</b>—avitakkavicāramattā jhānā vuṭṭhahitvā, maggā vuṭṭhahitvā, phalā vuṭṭhahitvā phalaṁ garuṁ katvā paccavekkhati; taṁ garuṁ katvā savitakkasavicārā khandhā ca vitakko ca uppajjanti. Avitakkavicāramatte khandhe ca vitakkañca garuṁ katvā assādeti abhinandati; taṁ garuṁ katvā savitakkasavicārā khandhā ca vitakko ca uppajjanti.