Paritto ca appamāṇo ca dhammā parittassa dhammassa sahajātapaccayena paccayo— appamāṇā khandhā ca mahābhūtā ca cittasamuṭṭhānānaṁ rūpānaṁ sahajātapaccayena paccayo. Paritto ca mahaggato ca dhammā parittassa dhammassa sahajātapaccayena paccayo— mahaggatā khandhā ca mahābhūtā ca cittasamuṭṭhānānaṁ rūpānaṁ sahajātapaccayena paccayo. Paṭisandhikkhaṇe mahaggatā khandhā ca mahābhūtā ca kaṭattārūpānaṁ sahajātapaccayena paccayo. Paritto ca mahaggato ca dhammā mahaggatassa dhammassa sahajātapaccayena paccayo—paṭisandhikkhaṇe mahaggato eko khandho ca vatthu ca tiṇṇannaṁ khandhānaṁ sahajātapaccayena paccayo …pe…. Aññamañña Paritto dhammo parittassa dhammassa aññamaññapaccayena paccayo—paritto eko khandho tiṇṇannaṁ khandhānaṁ aññamaññapaccayena paccayo …pe… paṭisandhikkhaṇe …pe… khandhā vatthussa …pe… vatthu khandhānaṁ aññamaññapaccayena paccayo; ekaṁ mahābhūtaṁ …pe… asaññasattānaṁ …pe…. Paritto dhammo mahaggatassa dhammassa aññamaññapaccayena paccayo …pe… paṭisandhikkhaṇe vatthu mahaggatānaṁ khandhānaṁ aññamaññapaccayena paccayo …pe…. Mahaggato dhammo mahaggatassa dhammassa aññamaññapaccayena paccayo—mahaggato eko khandho tiṇṇannaṁ khandhānaṁ aññamaññapaccayena paccayo …pe… paṭisandhikkhaṇe …pe….