Savitakkasavicārañca avitakkaavicārañca dhammaṁ paṭicca savitakkasavicāro ca avitakkavicāramatto ca avitakkaavicāro ca dhammā uppajjanti nahetupaccayā— ahetukapaṭisandhikkhaṇe savitakkasavicāraṁ ekaṁ khandhañca vatthuñca paṭicca tayo khandhā vitakko ca …pe… dve khandhe ca vatthuñca paṭicca dve khandhā vitakko ca; savitakkasavicāre khandhe ca mahābhūte ca paṭicca kaṭattārūpaṁ. Avitakkavicāramattañca avitakkaavicārañca dhammaṁ paṭicca savitakkasavicāro dhammo uppajjati nahetupaccayā—ahetukapaṭisandhikkhaṇe vitakkañca vatthuñca paṭicca savitakkasavicārā khandhā. Avitakkavicāramattañca avitakkaavicārañca dhammaṁ paṭicca avitakkaavicāro dhammo uppajjati nahetupaccayā—ahetukaṁ vitakkañca mahābhūte ca paṭicca cittasamuṭṭhānaṁ rūpaṁ. Ahetukapaṭisandhikkhaṇe vitakkañca mahābhūte ca paṭicca kaṭattārūpaṁ. Avitakkavicāramattañca avitakkaavicārañca dhammaṁ paṭicca savitakkasavicāro ca avitakkaavicāro ca dhammā uppajjanti nahetupaccayā—ahetukapaṭisandhikkhaṇe vitakkañca vatthuñca paṭicca savitakkasavicārā khandhā; vitakkañca mahābhūte ca paṭicca kaṭattārūpaṁ.