Paritto dhammo appamāṇassa dhammassa upanissayapaccayena paccayo— anantarūpanissayo, pakatūpanissayo …pe…. <b>Pakatūpanissayo</b>—parittaṁ saddhaṁ upanissāya appamāṇaṁ jhānaṁ uppādeti, maggaṁ uppādeti, phalasamāpattiṁ uppādeti. Parittaṁ sīlaṁ …pe… paññaṁ … rāgaṁ …pe… patthanaṁ … kāyikaṁ sukhaṁ …pe… senāsanaṁ upanissāya appamāṇaṁ jhānaṁ uppādeti, maggaṁ uppādeti, phalasamāpattiṁ uppādeti. Parittā saddhā …pe… senāsanaṁ appamāṇāya saddhāya …pe… paññāya, maggassa phalasamāpattiyā upanissayapaccayena paccayo. Paṭhamassa maggassa parikammaṁ paṭhamassa maggassa …pe… catutthassa maggassa parikammaṁ catutthassa maggassa upanissayapaccayena paccayo. Mahaggato dhammo mahaggatassa dhammassa upanissayapaccayena paccayo— anantarūpanissayo, pakatūpanissayo …pe…. <b>Pakatūpanissayo</b>—mahaggataṁ saddhaṁ upanissāya mahaggataṁ jhānaṁ uppādeti, abhiññaṁ uppādeti, samāpattiṁ uppādeti. Mahaggataṁ sīlaṁ …pe… paññaṁ upanissāya mahaggataṁ jhānaṁ uppādeti, abhiññaṁ uppādeti, samāpattiṁ uppādeti. Mahaggatā saddhā …pe… paññā mahaggatāya saddhāya …pe… paññāya upanissayapaccayena paccayo. Paṭhamaṁ jhānaṁ dutiyassa jhānassa …pe… ākiñcaññāyatanaṁ nevasaññānāsaññāyatanassa upanissayapaccayena paccayo. Mahaggato dhammo parittassa dhammassa upanissayapaccayena paccayo— ārammaṇūpanissayo, anantarūpanissayo, pakatūpanissayo …pe…. <b>Pakatūpanissayo</b>—mahaggataṁ saddhaṁ upanissāya dānaṁ deti, sīlaṁ samādiyati, uposathakammaṁ karoti, vipassanaṁ uppādeti, mānaṁ jappeti, diṭṭhiṁ gaṇhāti, mahaggataṁ sīlaṁ …pe… paññaṁ upanissāya dānaṁ deti …pe… vipassanaṁ uppādeti …pe… mahaggatā saddhā …pe… paññā parittāya saddhāya …pe… paññāya …pe… kāyikassa sukhassa, kāyikassa dukkhassa upanissayapaccayena paccayo.