Pītisahagato dhammo sukhasahagatassa dhammassa kammapaccayena paccayo— sahajātā, nānākkhaṇikā. <b>Sahajātā</b>—pītisahagatā cetanā sampayuttakānaṁ sukhasahagatānaṁ khandhānaṁ kammapaccayena paccayo. Paṭisandhikkhaṇe pītisahagatā cetanā sampayuttakānaṁ sukhasahagatānaṁ khandhānaṁ kammapaccayena paccayo. Nānākkhaṇikā—pītisahagatā cetanā vipākānaṁ sukhasahagatānaṁ khandhānaṁ kammapaccayena paccayo. Pītisahagato dhammo upekkhāsahagatassa dhammassa kammapaccayena paccayo. Nānākkhaṇikā—pītisahagatā cetanā vipākānaṁ upekkhāsahagatānaṁ khandhānaṁ kammapaccayena paccayo. Pītisahagato dhammo pītisahagatassa ca sukhasahagatassa ca dhammassa kammapaccayena paccayo—sahajātā, nānākkhaṇikā. <b>Sahajātā</b>—pītisahagatā cetanā sampayuttakānaṁ pītisahagatānañca sukhasahagatānañca khandhānaṁ kammapaccayena paccayo. Paṭisandhikkhaṇe …pe…. Nānākkhaṇikā— pītisahagatā cetanā vipākānaṁ pītisahagatānañca sukhasahagatānañca khandhānaṁ kammapaccayena paccayo. Sukhasahagato dhammo sukhasahagatassa dhammassa. (Cattāripi gaṇanāni passitvā kātabbāni.) Upekkhāsahagato dhammo upekkhāsahagatassa dhammassa kammapaccayena paccayo— sahajātā, nānākkhaṇikā …pe…. Upekkhāsahagato dhammo pītisahagatassa dhammassa kammapaccayena paccayo. <b>Nānākkhaṇikā</b>—upekkhāsahagatā cetanā …pe…. Upekkhāsahagato dhammo sukhasahagatassa dhammassa kammapaccayena paccayo. <b>Nānākkhaṇikā</b>—upekkhāsahagatā cetanā …pe…. Upekkhāsahagato dhammo pītisahagatassa ca sukhasahagatassa ca dhammassa kammapaccayena paccayo. <b>Nānākkhaṇikā</b>—upekkhāsahagatā cetanā …pe….