Avitakkavicāramattaṁ dhammaṁ paṭicca savitakkasavicāro dhammo uppajjati vippayuttapaccayā—vitakkaṁ paṭicca savitakkasavicārā khandhā, vatthuṁ vippayuttapaccayā. Paṭisandhikkhaṇe …pe…. Avitakkavicāramattaṁ dhammaṁ paṭicca avitakkaavicāro dhammo uppajjati vippayuttapaccayā—avitakkavicāramatte khandhe paṭicca vicāro ca cittasamuṭṭhānañca rūpaṁ, vicāro vatthuṁ vippayuttapaccayā. Cittasamuṭṭhānaṁ rūpaṁ khandhe vippayuttapaccayā. Vitakkaṁ paṭicca cittasamuṭṭhānaṁ rūpaṁ, vitakkaṁ vippayuttapaccayā. Paṭisandhikkhaṇe …pe…. Avitakkavicāramattaṁ dhammaṁ paṭicca savitakkasavicāro ca avitakkaavicāro ca dhammā uppajjanti vippayuttapaccayā—vitakkaṁ paṭicca savitakkasavicārā khandhā cittasamuṭṭhānañca rūpaṁ, khandhā vatthuṁ vippayuttapaccayā. Cittasamuṭṭhānaṁ rūpaṁ vitakkaṁ vippayuttapaccayā. Paṭisandhikkhaṇe …pe…. Avitakkavicāramattaṁ dhammaṁ paṭicca avitakkavicāramatto ca avitakkaavicāro ca dhammā uppajjanti vippayuttapaccayā—avitakkavicāramattaṁ ekaṁ khandhaṁ paṭicca tayo khandhā vicāro ca cittasamuṭṭhānañca rūpaṁ …pe… dve khandhe paṭicca dve khandhā vicāro ca cittasamuṭṭhānañca rūpaṁ. Khandhā ca vicāro ca vatthuṁ vippayuttapaccayā. Cittasamuṭṭhānaṁ rūpaṁ khandhe vippayuttapaccayā. Paṭisandhikkhaṇe …pe….