Mahaggataṁ dhammaṁ paṭicca mahaggato dhammo uppajjati hetupaccayā—mahaggataṁ ekaṁ khandhaṁ paṭicca tayo khandhā …pe… dve khandhe …pe… paṭisandhikkhaṇe …pe…. Mahaggataṁ dhammaṁ paṭicca paritto dhammo uppajjati hetupaccayā—mahaggate khandhe paṭicca cittasamuṭṭhānaṁ rūpaṁ. Paṭisandhikkhaṇe mahaggate khandhe paṭicca kaṭattārūpaṁ. Mahaggataṁ dhammaṁ paṭicca paritto ca mahaggato ca dhammā uppajjanti hetupaccayā—mahaggataṁ ekaṁ khandhaṁ paṭicca tayo khandhā cittasamuṭṭhānañca rūpaṁ …pe… paṭisandhikkhaṇe mahaggataṁ ekaṁ khandhaṁ paṭicca tayo khandhā kaṭattā ca rūpaṁ …pe… dve khandhe …pe…. Appamāṇaṁ dhammaṁ paṭicca appamāṇo dhammo uppajjati hetupaccayā—appamāṇaṁ ekaṁ khandhaṁ paṭicca tayo khandhā …pe… dve khandhe …pe…. Appamāṇaṁ dhammaṁ paṭicca paritto dhammo uppajjati hetupaccayā—appamāṇe khandhe paṭicca cittasamuṭṭhānaṁ rūpaṁ. Appamāṇaṁ dhammaṁ paṭicca paritto ca appamāṇo ca dhammā uppajjanti hetupaccayā—appamāṇaṁ ekaṁ khandhaṁ paṭicca tayo khandhā cittasamuṭṭhānañca rūpaṁ …pe… dve khandhe …pe…. Parittañca appamāṇañca dhammaṁ paṭicca paritto dhammo uppajjati hetupaccayā— appamāṇe khandhe ca mahābhūte ca paṭicca cittasamuṭṭhānaṁ rūpaṁ. Parittañca mahaggatañca dhammaṁ paṭicca paritto dhammo uppajjati hetupaccayā— mahaggate khandhe ca mahābhūte ca paṭicca cittasamuṭṭhānaṁ rūpaṁ. Paṭisandhikkhaṇe …pe….