Avitakkaavicāraṁ dhammaṁ paṭicca avitakkavicāramatto ca avitakkaavicāro ca dhammā uppajjanti vippayuttapaccayā—vicāraṁ paṭicca avitakkavicāramattā khandhā ca cittasamuṭṭhānañca rūpaṁ …pe… khandhā vatthuṁ vippayuttapaccayā. Cittasamuṭṭhānaṁ rūpaṁ vicāraṁ vippayuttapaccayā. Paṭisandhikkhaṇe vicāraṁ paṭicca avitakkavicāramattā khandhā ca kaṭattā ca rūpaṁ, khandhā vatthuṁ vippayuttapaccayā. Kaṭattārūpaṁ vicāraṁ vippayuttapaccayā. Paṭisandhikkhaṇe vatthuṁ paṭicca avitakkavicāramattā khandhā mahābhūte paṭicca kaṭattārūpaṁ, khandhā vatthuṁ vippayuttapaccayā. Kaṭattārūpaṁ khandhe vippayuttapaccayā. Paṭisandhikkhaṇe vatthuṁ paṭicca vitakko, mahābhūte paṭicca kaṭattārūpaṁ, vitakko vatthuṁ vippayuttapaccayā. Kaṭattārūpaṁ khandhe vippayuttapaccayā. Paṭisandhikkhaṇe vatthuṁ paṭicca avitakkavicāramattā khandhā ca vicāro ca, vatthuṁ vippayuttapaccayā. Avitakkaavicāraṁ dhammaṁ paṭicca savitakkasavicāro ca avitakkavicāramatto ca dhammā uppajjanti vippayuttapaccayā—paṭisandhikkhaṇe vatthuṁ paṭicca savitakkasavicārā khandhā ca vitakko ca, vatthuṁ vippayuttapaccayā. Avitakkaavicāraṁ dhammaṁ paṭicca savitakkasavicāro ca avitakkavicāramatto ca avitakkaavicāro ca dhammā uppajjanti vippayuttapaccayā—paṭisandhikkhaṇe vatthuṁ paṭicca savitakkasavicārā khandhā ca vitakko ca, mahābhūte paṭicca kaṭattārūpaṁ, khandhā ca vitakko ca, vatthuṁ vippayuttapaccayā. Kaṭattārūpaṁ khandhe vippayuttapaccayā.