Paritto dhammo appamāṇassa dhammassa nissayapaccayena paccayo—vatthu appamāṇānaṁ khandhānaṁ nissayapaccayena paccayo. Mahaggato dhammo mahaggatassa dhammassa nissayapaccayena paccayo—mahaggato eko khandho tiṇṇannaṁ khandhānaṁ …pe… dve khandhā …pe… paṭisandhikkhaṇe …pe…. Mahaggato dhammo parittassa dhammassa nissayapaccayena paccayo—mahaggatā khandhā cittasamuṭṭhānānaṁ rūpānaṁ nissayapaccayena paccayo. Paṭisandhikkhaṇe mahaggatā khandhā kaṭattārūpānaṁ nissayapaccayena paccayo. Mahaggato dhammo parittassa ca mahaggatassa ca dhammassa nissayapaccayena paccayo—mahaggato eko khandho tiṇṇannaṁ khandhānaṁ cittasamuṭṭhānānañca rūpānaṁ nissayapaccayena paccayo …pe… dve khandhā …pe… paṭisandhikkhaṇe …pe…. Appamāṇo dhammo appamāṇassa dhammassa nissayapaccayena paccayo—appamāṇo eko khandho tiṇṇannaṁ khandhānaṁ nissayapaccayena paccayo …pe…. Appamāṇo dhammo parittassa dhammassa nissayapaccayena paccayo—appamāṇā khandhā cittasamuṭṭhānānaṁ rūpānaṁ nissayapaccayena paccayo. Appamāṇo dhammo parittassa ca appamāṇassa ca dhammassa nissayapaccayena paccayo—appamāṇo eko khandho tiṇṇannaṁ khandhānaṁ cittasamuṭṭhānānañca rūpānaṁ nissayapaccayena paccayo …pe…. Paritto ca appamāṇo ca dhammā parittassa dhammassa nissayapaccayena paccayo— appamāṇā khandhā ca mahābhūtā ca cittasamuṭṭhānānaṁ rūpānaṁ nissayapaccayena paccayo.